2002年10月10日 木曜日 大雨

今日去層雲峽，一早約左Kevin，搭車去上川，再轉車先去到。天氣唔多好，落緊雨，去到之後就即刻座纜車上 黑岳五合目，再座吊車上七合目，嘩，好凍呀，可能上左山，又落雨啦，d雨好似變左雪咁，白色一粒粒飄落 0黎，又幾靚喎。



Lunch去左其中一間餐廳食拉面，食完之後就同Kevin分開行喇。我地就諗住去睇瀑布，本來想租單車踩入去， 但係驚落雨，所以都係行去啦。都要成個鐘頭先可以行到去睇瀑布0架，不過沿途d風景都好靚，差不多行到瀑 布就開始落雨啦，快d影完相就回程，因為都要成個鐘0架。大件事啦，越行越大雨，仲好大風呀，唯有頂硬上 繼續行啦，又凍又大雨，成身濕晒，真係覺得好淒涼。



返到旅館，即刻沖個涼等食飯，今晚訂左旅館晚餐，都幾豐富喎，西餐0黎0既，有湯又有飯，好飽呀。 食完飯又plan下聽日d行程啦，Kevin提議去四季彩之丘，離呢到半個鐘倒啦，d花仲多過富田花農場呀， 咁正，一於聽日一早去，希望唔好落雨啦！