2002年10月9日 水曜日 陰

今日就要離開住左三日0既酒店啦，起程去美馬牛，由札幌搭JR去旭川，再 由旭川轉車 (亞肥因為追火車跌倒喎)，用左差唔多半日先去到美馬牛，一去到就發現原來呢度真係好鄉村，個火車站連電梯 都無，我地一人拎住一個大0急，再加幾個行李袋，好唔掂，之後再發現原來d路都唔係平路0黎0架， 係石仔路，咁我地個0急拖唔到，要拎起先可以行 ...... 唉，唉，唉，終於到左我地間旅館啦 (其實 只係0係火車站隔離)。



今次住呢間『美馬牛Youth Hostel』都幾出名0架，好多香港人同台灣人 都住0係度，可能呢度靚啦。我地把握時間，撘火車去中富良野站 (成兩個鐘 個先一班火車0架)，仲未食lunch呀，0念住去到中富良野搵間靚靚餐廳坐下啦，Ha？點解好似個死城 咁0既，人都唔多個，連餐廳都搵唔到，行左好耐先搵到一間細細地0既supermarket，買左個 『炒面包』(係面包入面有炒面) 頂肚。

行左大半個鐘，終於行到『富田農場』，呢度夏天會種滿成個山都係 薰衣草，不過宜家秋天就會收割曬，只係剩番兩大塊彩色0既花比遊人參觀影相，我地一見到咁多花， 不停影相，都攪到好忙下，之後參觀一下佢0個d薰衣草香水工場，買左少少紀念品就要去趕火車去 富良野喇。去到富良野，為左搵我地想去0個間餐廳，又問人又睇地圖，搵左成大半個鐘先搵到，去 左好出名0既『Kumagera』食好出名0既『生牛肉刺 身』同埋『芝士豆付』(共 2400 yen)，仲叫埋新鮮焗薯。



之後食完飯又為左追火車，攪到輪到我跌親，好慘 ...... 返到旅館沖個涼，落去客廳坐下搵下聽 日行程0既資料，見到幾個香港朋友，同埋台灣人，我地用唔咸唔淡0既國語加埋手語，再唔得就加 埋寫字，大家傾左好耐日本去邊度玩最靚，仲約左新認識0既香港朋友Kevin聽日一齊去 『層雲峽』。好幣呀，呢間旅館打唔到電話番香港0架，我地仲會住兩 晚，好幣好幣。