2002年10月7日 月曜日 雨

今日行程係去『小樽』，記得第一次聽小樽呢個名，係睇漫畫 『將太的壽司』，書裡面話呢度週圍都係壽司店，唔知係咪呢？原來搭JR好快就到小樽0架，一落車就 去左車站隔離0既『三角市場』，見到好多長腳蟹，不過太貴，所以都唔會買。



北海道盛產各種生果蔬菜，哈密瓜特別出名，一開始我就食左個哈密瓜雪糕 (250 yen) ，好好味，跟住一路行，沿途好多精品手工藝店，0岩曬我口味，去左『小樽運河 工藝館』，去到『海鳴樓』音樂盒店，原來係可以自製音樂盒0架，我地心多多 ，揀來揀去，攪左成個鐘頭，我整左個大小企鵝音樂盒，係用叮噹主題曲0架。



仲有行埋『小樽倉庫』，『小樽貿易』，都差不多食晏，札幌最出名係拉面，去到 『運河食堂』，全部都係拉面鋪，咁就求其揀一間啦，食左個 『叉燒面』(550 yen)。食完飯繼續行，忽然見到有粟米湯汽水機喎，係小V指定話要0既手信，我地買左好 多罐，好重呀！沿途食左好多0野呀，食左一件新鮮哈密瓜 (200 yen)，又食左 『薰衣草』味軟雪糕 (300 yen)。



行到運河盡頭一帶，全部都係好靚0既鋪頭，有『北一硝子工房』，『活動木偶動物園』， 『小樽音樂堂』，『玻璃倉庫』 …… 天黑又開始落雨喎，都係去食飯lu，我地講好左今次旅行要食好d， 之前食左兩餐拉面，今晚一定要食壽司，因為小樽有條『壽司屋通』，終於決定左去 『Ki Sa No壽司』食啦，我地一人叫左一個雜錦壽司拼盤 (1800 yen) ，食食下唔覺唔覺，被亞肥偷左我d海膽喎，證明實在太好味啦。小樽運河個夜景好靚0架，真係唔捨得走呀。