2002年10月6日 日曜日 雨

今朝一早就係同亞肥去北海道0既日子，已經係第4次同亞肥去日本啦，去過九州同本 州，今次我地向北海道進發。使多左少少錢，搭國泰CX580 10:40am直航機直飛北海道，慳番好多轉機時間。大 約4:30pm就到左札幌新千歲機場，今次我地住 『Sheraton Hotel』，有機場巴士直達酒店，但係我地要去拎『JR Pass』， 但係又驚架巴士唔等我地，所以就用左9秒9時速跑去拎Pass，真係估唔到第一日已經做左咁大0既勞動。

話說我地住0既係『新札幌Sheraton Hotel』，但係就有兩個大笨蛋一直以為 『新札幌』=『札幌』，咁我地行出酒店就一路睇住個札幌地圖，一路想搵我地想 去0既地方，個心仲不停咁0念：「又話札幌係市中心，點解會咁靜焗0既，唔通北海道真 係同東京差咁遠？」結果 …… 向路人問路之後簡直係『晴天霹靂』呀，原 來距離札幌有好幾個JR站，仲以為book到間好方便0既酒店添 ……



因為搭車都攪到好晏，加埋落雨，去到札幌就要醫肚先啦，搵左好耐先搵到好出名0既 『味之時計台拉面店』，又倦又凍，食番碗熱辣辣拉面最正啦，叫左個『牛油面豉 湯扇貝拉面』(1500 yen) 同埋煎餃子，嘩！『哀書！』(好味)。之後行下地下街 PASEO就番酒店lu。