2007 年 2 月 7 日 星期三【晴】(38w1d) 有規律宮縮 2007-2-7 3:30am 前兩晚訓覺到半夜都會覺得個肚悶悶，唔係痛，但就好似 period 0黎的感覺，係一路都有呢 d 感覺，唔係有規律每幾分鐘一次的，所以成日想知，係咪就快生 bb 陣痛前兩日會有呢 d 感覺，但上網睇人地又唔係咁 bor，同埋朝早又無喎，所以無理 lu。 尋晚訓到 3:30am 醒醒地，又係覺得個肚悶悶的 period feeling，就去下 toilet 再訓，點知訓低就 feel 到宮縮，成個肚扯一扯的，咁我開始睇表，但又唔係好痛，唔知係咪陣痛，同埋痛興痛之間都仲係有肚悶悶的 feel ...... 真係唔係太痛，但每次相隔的時間都係 5-6 min 左右，咁我咪起身坐下，上次 Lydia 話如果陣痛就唔好訓要坐嘛，但我一起身就上網，專心打日記時又唔覺有痛喎，所以都係靜靜地坐下 feel 下 ( 車，你宜家咪打緊日記 law ) ...... 每 5 分鐘一次，不過只係子宮收縮，一 d 都唔痛，使唔使朝早入院呢，使唔使宜家去洗頭沖涼呢，但我尋晚先洗完喎 ...... 宜家係凌晨 4:30am，我仲未叫醒青瓜俠話佢知 ...... 2007-2-7 7:30am 宜家 7:30am，我岩岩沖好涼洗好頭了，因為頭先 7:15am 見紅了，都幾多喎，青瓜俠即刻睇書，但我真係唔多痛喎，所以我都叫佢今日返工，我一陣打比亞肥問下幾多點入院最容易拎到頭等房先，再叫媽咪0黎陪我入院啦 ....... 作死，我仲不停睇緊新假期本介紹食0野的書，見到每一樣0野都想食，但太遲了，入左院就無得食了，不如叫個 pizza 食下先，好想試三重芝士新口味。 2007-2-7 10:00am 都係決定入院了，早 d 去等下有無頭等房都好嘛，叫左亞肥0黎我屋企搵我先一齊去，oh，我要帶埋隻 pooh 公仔一齊去先得，call 唔到媽咪添，不過又唔想咁快叫佢0黎，驚攪到佢好緊張。 走了 ...... 入醫院了 2007-2-7 11:00am 等亞肥0黎陪我入院，我都真係執左鬼咁多0野入院添，上到去 7E 大房，見到好多人換曬衫坐曬0係度等床，又見到有人作動要推落產房，個情況都有 d 驚，我要求要頭等房，佢就帶我上 9E，咁亞肥幫我攪入院 d 0野，我就入去 check 宮縮同 bb 心跳，姑娘話你 d 宮縮真係好密喎，5 分鐘一次，問我點解唔覺得痛咁勁，咁我都唔知喎。 入到病房換左衫，就食 lunch 了，都幾開心0架，自己一間房又有電視，d 膳食都好正，今餐仲有 newyork cheese cake 添 ( 我最鍾意的 )，我仲好得閒咁睇下雜誌，好似去酒店渡假咁，咁因為尋晚無乜0野訓，所以宜家抖下先，等青瓜俠放工0黎探我。 呀，好似講到真係去渡假添，講番 d 宮縮又真係唔痛喎，不過就越0黎越勁，每一下都見到成個肚縮到凹左，係凹到好似由大肚變左無肚咁，5 分鐘一次，我就多數坐0係度唔訓太多，因為坐同企都可以等 bb 落得快 d。 青瓜俠篇 2007-2-7 11:30pm 醫院雖然係頭等房，但探病時間都係 5:30pm-8:30pm，青瓜俠已經偷雞留到 10pm，d 姑娘不停吹佢走，咁我都叫佢走啦，佢放左工都係返去換衫沖個涼抖下好 d，橫掂我宜家又無乜事，但佢返到去就無抖，拎左傻瓜魚去沖涼。 2007 年 2 月 8 日 星期四【晴】(38w2d) 有陣痛了 2007-2-8 4:00am ↑雖然有陣痛，但都仲係好輕鬆的 半夜訓到 4am 醒左，覺得每 5 分鐘一次的無痛宮縮開始有 d 痛，即是已經係陣痛，好開心呢，因為我怕再唔痛就要被趕出院了，青瓜俠今日放假 7am 就0黎左陪我，話就話唔比探病，但有時 d 姑娘都會隻眼開隻眼閉的。 8am 醫生巡房，話我只開左一度，下，攪到我好沮喪添，咁青瓜俠就同我落樓下行下，等佢可以開得快 d 啦，其實 5 分鐘一次慢慢佢都開始痛痛地的，唔痛果時好地地可以行，但一痛果下都係要企定用深呼吸忍一忍，咁都係一度，真係 ...... 一個人痛到死 2007-2-8 2:00pm 食完 lunch 青瓜俠又再度被人趕走了，咁咪叫佢去睇醫生先啦，因為佢今日係放 sickleave 嘛，要拎醫生紙，但佢一走左之後就大件事了，肚痛越來越勁，但又奇怪地越來越疏，之前 5 分鐘一次，宜家變成 10 分鐘先一次，姑娘每個鐘都會入0黎睇我，但佢見我 d record 10 分鐘先一次，佢話咁有排都未生得啦，所以唔幫我 check 開左幾多，但我話已經每次都好痛了，佢只係話如果忍唔到就叫佢，咁我又唔敢叫，怕叫佢 check 完又係開得一度，咁我會發癲的。 自己一個人在房內真係每 10 分鐘都痛到死，每次痛的時間長達一分鐘咁長，我訓在床上，每次一痛都真係典床典蓆，雙腳伸直踩住床尾，雙手拉住床頭，好似癲婆咁，青瓜俠又仲未返0黎，佢叫我同姑娘講，但我又唔知點，因為真係 10 分鐘先痛一次，人地就0黎生果 d 應該係每一兩分鐘痛一次的，後來發現原來企0係度會痛少 d d，所以一覺得就0黎痛我就企在牆邊。 入產房了 2007-2-8 3:45pm 到左 3:45pm 左右，突然有兩個醫生加一個護士入衝入0黎喎，話幫我 check 下開左幾多度，但我痛緊喎，仲要我即刻走上床，一 check 醫生就話生得啦，開四度，落產房了，下，好突然嚇死我了，即刻叫我換衫，call 青瓜俠返0黎，但電話乜都唔比帶落去，換好衫我仲可以自己行出房問係咪可以落去，d 姑娘好緊張叫我返入去抖下，仲話我開四度點解可以咁叻，可以唔聲唔聲無叫人無叫痛，仲自己行得 (開四度應該好痛的嗎？)。 跟住就有人推張床過0黎，我訓上去就被人推入產房了。 在產房內 2007-2-8 4:00pm 4pm 在產房內有兩個姑娘同助產士，我話要打止痛針 & 聞笑氣，跟住幫我放小便同穿羊水，好多好多水流出0黎，之後青瓜俠就可以入0黎陪我了，穿水後初初每隔幾分鐘痛一次，都幾痛，但止痛針同笑氣可以 cover 到，無咩事，我就只係不停吸不停吸。 但唔知點解好快好快，就由好痛變為勁痛了，我就痛到發左癲咁攬住條床欄，勁扯住個吸氣罩，又扯埋青瓜俠，每一下都勁吸氣，每呼一口氣都勁大叫，最恐怖係我痛到成床碌，連個頭都撞去床欄，助產士都叫我唔好郁，如果唔係會扭親條頸 ( 失儀 ~)，我知道我對腳都痛到失控地升起了 ( 要用 d 想像力先知我當時的失控 )。 跟住又係突然有人話生得啦，好殘忍地唔比我再聞氣，要 set 好個姿勢，但我全身無力喎，我好似唔知發生咩事咁，一來聞氣聞到 wing wing 地啦，佢叫我一痛就 push，好似去便便果種力，又要腳向外用力，手向自己拉，但個 pat pat 要向下用力，個頭要向前望( 我全程都合埋眼的，太倦了 ) .... 我完全做唔到呢 set 動作 law ...... 助產士話我唔識 push，push 左幾次都唔得，又話 bb 心跳有少少下降，就決定將 bb 吸出0黎 ( 其實我 push 完第一下都想叫佢不如幫我吸算啦 )，呢個時候仲要我簽咩同意書，寫字都無力啦，我聽到佢叫 mic「全部人入0黎 8 號房幫手」，我即刻有 d 驚，乜有咁嚴重嗎，醫生到了，set 好 d 0野 ( 連手術燈都推埋過0黎，set 鬼咁耐，玩0野咩 )，我再 push 左幾次 bb 個頭就吸左出0黎，我以為佢會拉埋 bb 個身出0黎添，以為攪掂，點知原來個身都要我再 push，兩次攪掂了 ...... 呼 ...... 出世了 2007-2-8 7:00pm bb 出世了，一剪了臍帶，姑娘就將 bb 成個撻在我身上面，嘩，我全身無力只係識講「好重呀！」，跟住又會比個0者0者你睇下係男仔，就拎左 bb 去抹身，醫生就繼續攪攪攪，攪胎盤同縫針，縫針真係勁痛，我好想一路吸氣一路縫，但又唔得，終於乜都攪好曬，姑娘抱 bb 比我攬下影下相，bb 好活躍係咁郁，青瓜俠仲拍埋 video ( 比我地攪左鬼咁耐，其實係 d 人唔知做乜好忙唔理我地 )，我繼續在產房休息一小時就上病房，媽咪同亞肥都有0黎，姑娘又抱 bb 入0黎比我地睇同叫我試餵母乳。 11pm 青瓜俠又被姑娘趕走了，我都要抖下，勁倦呢，全身無力。不過到左半夜，有人0黎炒醒我，話一定要 6 小時內去小便喎，唉，好煩呢，傷口好痛嘛。 青瓜俠篇 青瓜俠返到屋企當然又係唔訓啦，佢話 bb 出世要即刻砌床嘛，又話原來好難砌，我估佢都攪左成晚先去訓。