一講我出世就知我係醒目女啦，事關我係年三十晚出世 0既，即係一出世就有利士逗，真係收都收唔切呀。我絕對係一個肥BB，一出世就有 八磅重，好有份量，d頭髮重係楝篤企添，完全違反地心吸力，不過媽咪話我好乖， 食奶食得好快，係全個BB房最快0既一個，攪到其他媽咪都好羨慕喎 (其實係大食！)。
我細細個就聰明伶俐，讀書成績唔差，從來都唔使爸爸媽咪擔心，我好鍾意畫畫， 我記得由細到大，差不多每次美術堂d作品都會貼堂，好鍾意畫室內平面圖 (真0架，係由幼稚園開始)，又好鍾意砌積木，細個時 我成日都話大個要做『畫則師』。 我最鍾意玩毛公仔，細個時特別偏愛熊貓，買公仔我一定會揀熊貓，所以我有好多熊貓 公仔：貓貓，歡歡 (有三代0架)，佳佳，熊熊 ...... 好懷念佢地。
童年時期發生0既大事就係由紅磡搬入 沙田，0個時仲好細個，搬屋對我0黎講真係一件好好玩 0既事，新傢俬，新電器，新環境，新學校 ...... 全部0野都令到我好開心。沙田真係一個好 地方，呢度有好多住0係市區玩唔到0既0野，做完功課會落樓下公園踩單車，有時會去溪澗捉 蝌蚪，又會同左鄰右里d小朋友0係走廊玩，放假爸爸又會帶我地去屋企對面爬山，我0既童年 生活都幾多姿多彩。
從沙田轉校出番九龍讀書之後，我0既生活圈子又擴闊左，開始周圍去周圍玩，經常蒲點有旺角， 尖沙咀，銅鑼灣 ..... 我最鍾意去新地方，見識新事物，樣樣0野對我 0黎講都十分之吸引，所 以我0既興趣都十分廣泛，乜0野我都會去學：設計，劍擊，結他，獨木舟，二胡，跆拳，電腦， 手工藝 ...... 我又好鍾意識新朋友，對唔同 0既團體都會感興趣，曾經參加過女童軍，義工， 教會，上莊 ......
由於呢種性格，我愛上了旅行，旅行係完全滿足到我0既需要，儲錢唯一的目的，就係旅行，不過 我暫時所去過0既國家唔多，所以我仲有好多地方想去，我唔想要刻板0既生活，唔可以受束縛。有 時真係覺得時間實在過得太快，青春好似離我越來越遠咁，可能好快就會進入一個死板乏味0既人 生必經階段，不過回想一下，我0既青春真係無白過，所以我都要將宜家0既生活活得精彩，唔好等 第時後悔呀。
