記者：傻瓜你好，我想同你做個家訪呀，見你平時個人咁開心， 想了解下你0既家庭生活嘛。首先由爸爸媽咪開始問起啦。請問你爸爸媽咪係咪靚仔靚女0黎0架？ 傻瓜：靚仔靚女？咁梗係啦，我爸爸後生0個陣真係成個 『難兄難弟』時代0既胡楓咁0架，朝朝早都用髮乳set行個頭，跟住著住套老西， 就算去郊野公園玩都係著老西0架。我媽咪更加唔使講啦，講你都唔信呀，佢結婚0個陣得21寸 腰0架咋，有證據0架，我見過佢d舊衫，絕對係21寸。再講多個鮮為人知0既秘密比你知呀，佢地d婚紗相係 『芝柏』影0架，好IN呀！ 記者：咁佢地個人點0架？會唔會管教好嚴0架？ 傻瓜：Ummm ...... 我爸爸平時比好多自由我地， 都唔會過問我地讀書d 0野，但係一發惡0個陣，好勁0架，嚇死你呀。 咁媽咪呢，我地所有0野都係由佢照顧0既，樣樣0野都會比較緊張啦，會幫我地溫書，同我地周圍搵好學校，默書唔合 格會比佢鬧。基本上我地屋企0既管教都幾自由，我地想做乜，想學乜，都可以有自己0既選擇。 記者：咁你地細個0個陣都應該幾開心喎，你地會有d咩家庭活動架？ 傻瓜：我地細個0個時都幾攪笑0架，d生活好鬼死有規律，星期一 至五都係返工返學，但係星期六呢，就一定係食完晚飯後去『新中華國貨公司』行街， 每次都會一人揀一份玩具，所以我地一定會星期六晚飯之前做曬功課，如果唔係就無得去0架啦。星期日爸爸就一定會 帶我地出去玩，通常都係去郊外啦，公園啦，遊樂場啦，不過都曾經有一排個個星期都去 『大大公司』行街喎。 記者：嘩，你就好啦，咁多街去。咁佢地有無偏心0架？ 傻瓜：我自己覺得無law，其實我地三姊妹三個都有唔同性格， 大家姐亞玲好文靜，好聽話，媽咪話佢係最容易揍，二家姐亞肥細個雖然成日唔啋人，但係有時都會鬼鬼馬馬咁， 爸爸成日話最聰明係佢呀，咁輪到我喇，咁我就梗係人見人愛啦，我細個都真係幾多人錫0架，老師呀， 親戚呀 ...... 都好錫我0架，可能我"嗲"d，又精靈d，逗得d大人好開心。總之三個都得人鍾意啦，heee ...... 記者：Heee ...... 你宜家都仲好精靈丫。咁你宜家兩個家姐都結左婚， 你地仲有咩方法維繫感情？ 傻瓜：雖然佢地結左婚，但係佢地都成日返屋企食飯0架，逢星期 日都係Family Dinner，通常無咩必要，都唔可以約朋友，要返屋企食飯0架。同埋我地都成日會一家人去玩，行山啦， 燒野食啦，打麻雀仔啦 ...... 都係聯絡感情0既方法。