『自我 100 點 version 1』

@2005-3-25

關於外表

001. 一出世就係肥 bb，差不多八磅重，食奶速度驚人
002. 大過慢慢開始廋，小學和中學都保持住中等身形
003. 第一年入 poly，一有空堂就走去食 tea，一個學年肥左十幾磅
004. 維持0係同一個磅數好多年，以為成世都係咁，前幾年發力減肥，成功左先知原來我都可以瘦，不過宜家肥番
005. 細個時好想近視，好想帶眼鏡，成日拎亞肥副舊眼鏡帶
006. 中學開始有近視，第一副眼鏡係勁嘔心的膠框粉紅色小雲眼鏡
007. 自細頭髮多，又黑又硬，媽咪又唔識同我扮靚，一直都係冬菇頭
008. 最怕去髮型屋，次次都被人話我多頭髮，又話要用好多洗頭水，好討厭
009. 頭髮唔靚但又好想留長髮，所以中學時一直都是束馬尾的，廢時人地以為女鬼現身
010. 自從電直版出現後，就有好轉，宜家仲有埋負離子添，好感激時代進步

關於性格

011. 水瓶座，完完全全符合星座書中描述的水瓶座性格
012. 唔可以被人管束，長期需要個人自由，思想自由，言論自由
013. 做事沒有太長遠的計劃，鍾意即興，鍾意改變
014. 鍾意無拘無束，唔著重老土禮儀，但會識得睇環境場合，隨時變面
015. 一條大懶虫，唔到最後關頭都唔會出力做0野
016. 細個有小聰明，好喜歡玩智力遊戲，邏輯遊戲，好有成功感
017. 做0野無乜恒心，辛苦少少就想放棄
018. 最怕要虛偽做人，最憎人擦老細鞋
019. 記性好，最憎人講過 d 0野唔算數，應承左就一定要做
020. 好怕遲到，會因為塞車遲到而喊，所以都唔鍾意人無原因地遲到，仲要毫無歉意


關於屋企

021. 屋企唔係有錢人，但都唔使捱窮，樣樣0野都滿足到我
022. 到現在為止只搬過一次屋，細個住紅磡，宜家住沙田
023. 家中最細，有兩個家姐，自細被寵壞，係屋企0既霸王
024. 爸爸早已過身，之後屋企所有電器 & 裝修，全部由我或我男朋友負責
025. 兩個家姐一早十年前已結婚，已經唔多記得同佢地一齊住0既日子係點樣
026. 無咩親戚係好熟落，全部都係一年見一次左右
027. 係超級儲物狂，家中有九成0既櫃都放滿我0既0野
028. 好相信自己可以自立生活，但從來未試過，連家務都唔識做
029. 想要一間自己0既屋，放曬我鍾意0既0野，再無人話我多垃圾
030. 搵屋的要求好矛盾，又想住村屋，又想屋企樓下有大商場

關於讀書

031. 幼稚園最叻0既記錄係連續三年上下學期都考到第一名
032. 小學中學都係讀女校，所以大部份朋友係女仔，入大學之前連一個男仔朋友都無
033. 中學時曾超級沉迷歌星，明星，球星，瘋狂程度係傾家蕩產
034. 中學時學校雖然沒有壞學生，但也算是班中最頑皮的一個
035. 讀書永遠都唔會令自己辛苦，試過好輕鬆地過關，也試過嚴重失敗
036. 讀書只為考試升班，一入就出，考完試就乜都唔記得曬
037. 參加過女童軍，但忍受唔到 lunch 要 on duty 守門口無得去玩，放棄左
038. 中學畢業後讀過統計，之後再讀過電腦
039. 一入 poly 覺得樣樣新鮮，一口氣入左十個會，實際出席的只有幾個
040. 讀 poly 時曾學人上莊，係數學系會0既內務副主席，即是內褲


關於工作

041. 中五暑假曾經同幾個同學一齊做過兩個月工廠妹
042. 中七暑假做過十日 call 台，因為咁而學識倉頡輸入法
043. 計埋暑期工，總共做過四個政府部門
044. 好怕見工，但幾次見工經驗都係見得好開心，有講有笑
045. 在統計處工作的日子係最開心，亦都係最唔開心
046. 最開心係可以同同事成為好朋友，一齊並肩作戰
047. 最睇唔過眼 d 蠢老細作威作福，又有大把人甘願去擦佢鞋
048. 宜家工作係 IT，初入行，係公司入面一個很低級沒出色的員工
049. 無0念過會摶扎升職，只想返工開開心心無壓力
050. 想開間小鋪頭，唔望賺大錢，只想做自己喜歡0既0野

關於愛情

051. 幼稚園時有過一段 puppy love，日日都會約某男同學去某小學門口等
052. 因為搬入沙田，二年級曾讀過一年男女校，當時我係品學兼優，曾經有三個男同學追我
053. 之後一直讀女校，也曾間中暑期活動識到一 d 男仔，都有暗戀過兩個人
054. 入 poly 後第一次拍拖，分手後成為左好朋友
055. 轉工後識左青瓜俠就係第二次拍拖


關於顏色

056. 細過最喜歡顏色係粉紅色，但中學時由於校服係粉紅色，所以討厭，中學畢業後又再次喜愛
057. 好喜歡彩色繽紛，好喜歡紅色，鮮色和粉色
058. 不太喜歡深沉的顏色，例如啡色，灰色，墨綠色
059. 有一段時期好鍾意綠色，係因為鍾意大自然關係
060. 不太喜歡 cyber feel，太冷冰冰，鍾意 warm d 感覺

關於動物

061. 細過最鍾意動物係熊貓，大少少就鍾意埋熊仔，但都只係毛公仔，真熊就唔好攪我
062. 由細到大曾經養過雞仔，兔仔，狗仔，雀仔，金魚，巴西龜，倉鼠
063. 成世人最怕係家禽，所有有翼0既都怕，係怕得要死，望到張相都會大叫果種喎
064. 都有少少怕銀色的魚，覺得佢隻眼同埋 d 魚鱗好恐怖
065. 宜家最想養一隻狗，最好係歌姬犬 or 秋田犬


關於興趣

066. 自細鍾意畫畫，每次美術堂 d 畫都會貼堂
067. 小學和中學時曾參加過公開繪畫比賽，拎過兩次獎
068. 自細鍾意畫室內平面圖，立體圖形，自問都幾有立體感
069. 所有手工藝都喜歡，舊時不太喜歡太女仔的玩意，例如織冷衫，插花，煮0野食
070. 但近幾年就好熱衷 d 女仔玩意，人大左，性格變左，定係興趣已廣泛到要玩埋女仔0野呢

關於食物

071. 討厭一切腥，蘇和苦的食物，所以唔食蒸魚，羊，牛，苦瓜，唔飲鮮奶，苦茶
072. 明符其實妹仔肚，鍾意食豆腐，芽菜，青豆，粟米，所有蔬果類但唔係菜類
073. 對鮑參翅肚，山珍海味都無大興趣，情願食漢堡包
074. 最唔鍾意飲藥材老火湯，最鍾意飲金寶雜菜湯
075. 鍾意食甜0野，朱古力，雪糕，糖，蛋糕，但又怕肥
076. 前幾年好食得辣，最愛麻辣火鍋，近幾年無咁食得辣
077. 七年前開始唔食牛肉，原因為皮膚敏感
078. 唔鍾意食飯，但鍾意食面，粉，面包，餅乾 ...... 其他所有澱粉質食物
079. 由細到宜家都唔識食魚揀骨，一感覺有少少骨在嘴裡，會立刻將所有0野吐出來
080. 食無定時無定量，鍾意可以食好多，唔鍾意情願餓死都唔食


關於運動

081. 運動神經好差，又無力，打羽毛球連開波都唔過網，又容易倦，沒有一樣運動專長，但樣樣都會玩下
082. 小學學校不太注重體育，好多時只係做下柔軟體操，到五六年級更加係將體育堂變成數學堂
083. 心口有個勇字，唔識游水，但考到獨木舟一星章，也玩過珊珊的滑浪風帆
084. 咩都會玩，劍擊，網球，壁球，壘球...... 都正式學過，最自豪係學識滑雪，從最高級雪山成功滑落0黎
085. 最怕跑步，但曾參加過統計處運動會，代表跑四乘一百接力

關於收藏品

086. 最鍾意的公仔係叮噹，其次就有好多，數唔曬，但都係一 d 動物公仔，唔鍾意洋娃娃
087. 鍾意幫 d 毛毛公仔改名，佢地會有屋企人，有唔同性格，有 d 會返學，有衫著，好有感情，所以唔可以掉0架
088. 曾經幫我 d 毛公仔自編自導過兩輯劇集，用攝錄機拍低，又會成日同公仔影相
089. 細個最鍾意0既玩具除左毛公仔，就係積木，電子遊戲機，砌模型，我好男仔頭0架
090. 三歲開始有自己一本郵票簿集郵，返大陸會特登去買郵票，會自己去睇郵票展，到宜家停左集郵
091. 中學時差不多日日放學去行街，買明星相，襟章，漫畫，足球雜誌
092. 舊時儲過好多0野，儲過鉛筆，擦子膠，火柴，書簽，萬變咭，明星相，信紙，貼紙，雜誌，馬騮，XO .....
093. 大過左改變左，鍾意買書，舊時買無數漫畫，有過千本，宜家會買不同類型0既書，但好多都未睇
094. 仲有少少電器潮流引，喜歡追求最新的數碼相機，palm，電腦產品，但呢個習慣已經戒左
095. 好鍾意一 d 一舊舊0既擺設，水晶呀，陶瓷呀，乜都0岩，尤其係 precious moment 公仔


關於旅行

096. 七大洲只去過亞洲，歐洲和美洲，好想去澳洲
097. 唔鍾意果 d 歐洲八國十天團，喜歡每個國家慢慢睇，所以歐洲只去左一次英國，一次瑞士
098. 三年前儲左一年錢，去玩曬美國東西岸 & 加拿大，達成左夢想，但原來美國都唔係咁好玩
099. 鍾情於日本，去過八次，仲會再去，其實風景好多地方都靚過佢，點解咁鍾意又解釋唔到喎，情意結嘛
100. 鍾意旅行，所以想旅行結婚，去日本又好，關島又好，一 d 小教堂舉行婚禮